सहिद स्मारक ‘सी’ डिभिजन लिग फुटबल अन्तर्गत पुल्चोक स्पोर्टस् क्लबसँग २–२ गोलको बराबरी खेलेसँगै आरसी ३२ फुटबल एकेडेमीका खेलाडी र अफिसियल म्याच रेफ्रि र अफिसियलविरुद्ध जाईलागेका छन् ।
आइतबार सातदोबाटो स्थित एन्फा मुख्यालयमा भएको दिनको अन्तिम खेल २–२ गोल अन्तरको बराबरीमा समाप्त भएसँगै आरसी ३२ का खेलाडी र अफिसियलले एन्फा म्याच अफिसियलविरुद्ध हात हालाहालको स्थितिमा पुगेका थिए ।
निर्धारित समयको खेल २–२ बराबरी भएसँगै हानाहान अवस्था सृजना भएको थियो । आरसी ३२ क्लबले दुई पटक सम्म लिएको अग्रता जोगाउन नसकेपछि टिम एक्कासी म्याच अफिसियलविरुद्ध आक्रोसित भएको थियो ।
पुल्चोकले दुई पटक खेलमा फर्कदै अंक खोस्न सफल भएको थियो ।
यस अघि निर्धारित ९० मिनेटको खेल १–१ गोलको बराबरीमा सकिएको थियो । न्यसपछि ६ मिनेट थपिएको इन्जुरी समयमा आरसी ३२ ले २–१ को अग्रता लियो ।
तर गोल सेलेब्रेसन पछि आरसी ३२ का अफिसियललाई कार्ड देखाउँदा समस्या निस्किएको थियो । कार्ड देखाए लगत्तै पुल्चोकले पुनः बराबरी गोल फर्कायो ।
यसपछि भिआईपी बक्समा रहेका आरसी ३२ का प्रतिनिधि रविन चन्दले रेफ्रि एसेसरविरुद्ध जाई लागेका थिए । बोल्न क्रममा उनको व्यवहार ठिक नभएपछि रिजर्भ रहेका अन्य रेफ्रिले रविनलाई रोक्ने प्रयास गरेका थिए ।
तर आरसी ३२ का खेलाडी नै रेफ्रिविरुद्ध जाई लागेपछि मैदानमा घम्साघम्सि सुरु भएको थियो । करिब ७ मिनेट घम्साघम्सि चलेपछि स्थिति सामान्य अवस्थामा आएको थियो ।
लिग कमिटी डिरेक्टर संजिव मिश्रले चाडै बैठक बसि छानविन र कारबाहि हुने न्युज कारखानालाई बताए ।
